రుధిరజ్యోత్స్న - నెత్తుటి వెన్నెల

.
" 'రుధిరజ్యోత్స్న' అబ్బ! ఎంత అందమైన పదమో కదూ!"

"నీ మొహం! నెత్తుటి వెన్నెల నీకు అందంగా కనిపిస్తోందా? అయితేగియితే భయంకరంగా కనిపించాలి!"

"నేను చెపుతున్నది 'రుధిరజ్యోత్స్న' గురించి 'నెత్తుటి వెన్నెల' గురించి కాదు"

"రెండూ ఒకటే"

"కాదు"

"ఎందుకు కాదు?"

"ఎందుకంటే రెండూ రెండు వేరేవేరే పదాలు కాబట్టి"

"వేరు పదాలయినా అర్థం ఒకటే కదా"

"నేనంటున్నది పదాల గురించి. వాటి అర్థం గురించి కాదు"

"నువ్వు మరీ వితండవాదన చేస్తున్నావ్"

"ఇందులో వితండం ఏముంది?"

"అర్థం కాకుండా పదం నచ్చడమేమిటి? అర్థం లేని మాట!"

"ఒక మనిషి గుణం ఎలాంటిదయినా, తన అందం నచ్చొచ్చుగా?"

"అసలైన అందం గుణంలోనే ఉంది"

"అది వట్టి బూటకపు మాట! అర్థంలాగానే గుణం కూడా సందర్భాన్ని బట్టి మారిపోతూ ఉంటుంది"

"అందం కూడా ముసలితనంలో వాడిపోతుందిగా?"

"అవును, పదం కూడా వాడివాడి అరిగిపోతే ముసలిదైపోతుంది!"

"అయితే అర్థం కన్నా పదమే గొప్పదంటావా?"

"నేనలా అనలేదే!"

"మరి?"

"పదాన్ని పదంగా ప్రేమించ వచ్చంటున్నా"

"అర్థంతో సంబంధం లేకుండానా?"

"ఉండీ... లేకుండా..."

"ఏమిటో, నువ్వెప్పుడూ నాకు అర్థం కావు!"

"అయినా నువ్వు నన్ను ప్రేమించడంలా?"

"..."
.