వలను తానె అల్లుకుంది వెఱ్ఱిచేప, తానే
వలలోకి దూకింది వెఱ్ఱిచేప
వలను తానె||
వలలోపల చిక్కుకొని
గిలగిలమని కొట్టుకొని
బలే! బలే! అనుకుంది వెఱ్ఱిచేప, తన
తెలివికదే మురిసింది వెఱ్ఱిచేప
వలను తానె||
ఓపికంత పోయాక
ఊపిరందకున్నాక
ఓపలేక ఏడ్చింది వెఱ్ఱిచేప, తనను
కాపాడేదవరంది వెఱ్ఱిచేప
వలను తానె||
తెలివితకువ చేపను కని
మొలకనవ్వు నవ్వుకొని
చేప దీసి బుట్టనేసె జాలరోడు, మరో
చేప కోస మెదురుచూసె జాలరోడు
చేప దీసి బుట్టనేసె జాలరోడు, మరో
చేప కోస మెదురుచూసె జాలరోడు, వీడు
జాలరోడు కాడు వట్టి మాయలోడు, వీడు
జాలరోడు కాడు వట్టి మాయలోడు!
